Mmapelo O Ja Serati (Paperback or Softback)

mapelo O ja serati ke terama ye e le go ka ga lesogana leo go thwego ke Tumišo. Yena o be a ratana le lekgarebe leo go thwego ke Lerato. Ge nako e ntše e sepela, Tumišo o ile a ikhwetša a ithatetše lekgarebe le lengwe leo go thwego ke Lethabo, gomme a mo rata go feta ka mokgwa wo a bego a rata Lerato. Go ile goa se be bonolo go re Tumišo a kgaogane le Lerato yoo e be a se a ka a mo direla phošo le ka e tee gore a kgone go ratana le lerato la pelo ya gagwe. Ge matšatši a gatana direthe, Lerato o ile a thoma go gononela gore go na le seo se diregago gare ga Tumišo le Lethabo, a ba a feletša a eya go Lethabo go mo tšhošetša gore a kgaogane le lesogana la gagwe. O rile go dira bjalo ya ba e ke o be a ba hlohleletša gore ba ratane le go feta, seo se ile sa mo ferekanya kudu moo e le go gore o ile a ya go nkadingala gore a mo fe sehlare sa moratišo gore a ješe Tumišo pele Lethabo a mo amoga yena. Ka madimabe seo se ile sa se mo šomele a kgopišega kudu moo e le go gore o ile a lefa batho go re ba bolaye Lethabo, ka madimabe leano leo le lona la folotša.

Gomme o ile a boyela go nkadingala a mo lefa gore a tloše Lethabo ‘tšatšing, ka madimabe maleatlana a nkadingala le ona a hlolega. Moo o ile a bona bokaone e le go betha Lethabo ka molamo go re a mmolaye goba a mo gobatše moo e le go gore Tumišo o tla re ge a mmona a sehlo a nyaka go ikamantšha le yena gape. Ka morago ga dikgobalo tšeo Lethabo o ile a hwetšwa mmileng a rapaletše ba nama ba mo iša bookelong, Tumišo o rile go kwa go re Lerato ke yena a gobaditšego Lethabo ka mokgwa ola, a nama a befelwa kudu moo e le go gore o ile a arogana le yena. Ka morago ga moo a ya bookelong go Lethabo go kgopela tshwarelo. Lethabo o rile go mo tshwarela a nama a mo kgopela gore a mo nyale, ba nama ba nyalana ya ba maswi le dinose.